Assalamu’alaikum Wr. Wb
Bismilahirohmanirochim.
Alkhamdulillah Alkhamdulillahi Robbil ‘alamin............
Alkhamdulillah Alkhamdulillahi Robbil ‘alamin............
Mugi tinebihna saking tulak-sarik sarta bebenduning pangeran ingkang maha agung, jalaran kula kumowantun ngadeg wonten ngajeng tuwin iring handika , sarta
nggempil kamardikan pangandikan handika sami, kang datan nyuwun idi palilah
langkung rumiyin.
Nun-injih mradapa awit saking keparengipun Bapa ....... (hamengku gati) ing ri kelenggahan
puniki katemben kajugrugan wukirsari linuberan seganten madu prasasat linobong
ing manah ingkang dahat suka amarwata suta dene hangawuningani yenta para tamu
dalah para pepunden wus kebak ambalabar ngbaki sajroning sasana pawiwahan.
Pramila Panjenenganipun Bapa ...... (hamengku gati) datan kuwawi paring pangandikan,
namung kandeg madyaning Jangga, pramila sanadyan namung kanthi samudana panjenenganipun hamiji dateng diri pribadi kula, ingkang supadas hangaturaken babaring
sedya wudharing kandha wigatining pawiwahan ing titi lakenggahan puniki.
Namung sakderengipun kala minangkani pamunundutipun Bapa ..... (hamengku gati) langkung rumiyin kula
hangaturaken Pangalembana Panuwun miwah panyuwun wonten ngarsa dalem Allah SWT
ingka tansah paring nugraha kang agung dateng kita sami, kacihna ing titi
kalodangan punika kepareng mbabar daya pangaribawa ingkang agung tumanduk kula jengandika
sami, katitik kita sedaya taksih dipun keparengaken hangestreni sedyaning kang hamengku gati
ing papan puniki kanthi kebak raos suka gumbiraning manah.
Pramila kepareng matur wonten ngarsanipun
Panjenengan para Pepunden, para pinisepuh, ingkang Hanggung mestuti dateng
pepoyaning kautaman, ingkang pantes pinundhi.
Panjenenganipun Para
purnakarya saklebeting praja, ingkang satuhu pana ing pamawas tuwin lebda ing pitutur ingkang pantes nampi
pakurmatan.
Panjenenganipun para
pangemban - pangembating praja, satriya satriyanging nagari saha para
priyogung ingkang satuhu luhuring budi ingkang dahat kinurmatan.
Panjenenganipun Para
pangarsaning agami para alim ulama, ingkang rinten pantaran ratri tansah sumandhing saha hanganggit kitabing wahyu ilahi pinangka keblating panembah Jati ingkang satuhu
bagya mulya.
Ingkang sepisan Panjenengan-ipun Bapa.... ingkang binantu sedaya Kulawangsa ngaturaken ageng-ing panuwun dene jengandika sami, sampun kepareng hamiji
wekdal, hanglonggaraken penggalih, saperlu minangkani atur sedahan kula, saperlu
hanjenengi / Hangestreni ing adicara panggih-ing putra pinanganten sarimbit samangke. Sarta nyuwun tambhahing donga
pangestu jengandika sami, murih
lampahing titi laksita adi cara ing kalenggahan puniki, tansah sembada kang
sinedya, nyawiji kang kaesti, jumbuh kang ginayuh satemah rahayu kang tinemu.
Sanggyaning para rawuh ingkang satuhu dahat kinurmatan, Panjenengan-ipun
Bapa .... (hamengku gati) dalah para kadang hamong tamu nyuwun lumunturing
sih-pangapunten dateng handika hambok bilih hanggen kula tumanggap dateng rawuh
jengandika kirang gupuh ananging mboten ateges sengguh namung jalaran kirang
wanuh, sarta hanggen kula ngaturi palengghan kirang trep dateng kalenggahan jengandika,
jalaran kirang pana ing pamawas.
Para pinilienggah kang satuhu bagya mulya, Sanadyan sampun kepara randhat
Panjenengan-ipun Bapa .... (hamengku gati) hangaturaken kasugengan
awit rawuh jengandika sinartan atur panuwun kang tanpo pepindhan awit
paringipun cuilaning bondo handika, pinangka pambiyantu dateng bot repot kula
sagotrah, namung mbok bilih panjenenganipun (ingkang
hamengku gati) datan kuwawi caos piwales malah kepara tangeh anggenipun
badhe caos piwales dateng jengandika, pramila namung sumarah dateng ngarsa
dalem Alloh mugi mugi sumbangsih jengandika linebetna amal jariah, lan
kalintoni Ganjaran rizeki ingkang sakelangkung sembada saking ngarsa dalem Alloh
SWT.
Sanajan pahargyan puniki sampun karancang tebih sak-derengipun, sarta ka
titi kanthi permati, ewodene taksih kathah kekirangan-ipun sahingga damel
cuwaning penggalih jengandika sami, pramila panjenenganipun Bapa .... (hamengku gati) nyuwun pangapunten
ingkang tanpa pepindhan.
Pahargyan prasaja menika tangeh kelampahanipun menawi datan binantu saking sedaya
sanak kadang, tangga tepalih Panawung kridha , ingkang sampun paring iguh
pertikel dateng lumampahing pahargyan pukini, pramila datan wonten atur ingkang
pantes kula aturaken kejawi Atur panuwun ingkang tanpa upami dateng jengandika.
Mugi mugi amal soleh handika, pinaringan lelintu ganjaran nugraha ingkang
langkung sebada saking ngarsa dalem Allah SWT.
Para pinilienggah kang satuhu bagya mulya, Panjengeanipun Bapa........... (hamengku gati) ing titi kalenggahan
piniki kepareng hangrakit sekar cempaka mulya pinangka sarana, hanggenya ngentas pitulus, mahargya suta hamiwaha siwi putra pinanganten sarimbit,
nun-injih Putra pawestri-nipun Bapa.....
(hamengku gati) nun-injih Nimas ..... (
asma manten putri ) kaliyan putra panjalunipun Bapa ..... (besan) ingkang gagah dedeg piyadege, sigit pasuryane dasar
alus laku jantrane, nun injih Bagus ....(
asma manten putra ).
Sanggyaning para rawuh ingkang satuhu dahat kinurmatan, Pamundhut-ipun
kadang besan sutresna dinten kang wus kawuri, kinen hangijabaken ingkang putra
pun bagus ....( manten kakung )
kaliyan anak kula pun Genduk ayu (manten
putri) sampun saged kula pinangkani, dene ijab sampun kelampah kula
tindaka-aken ing ari-kalenggahan punika, wanci tabuh ...... wonten ing papan
mriki, kanthi satataning, agami, budaya lan satataning pemerintah, nun-injih
awit saking ridlaning Allah SWT, sarta tambahing donga pangestu jengandika
sami, saged kaleksanan kanthi rahayu tebih sakir sambikala.
Pramila kanthi punika panjenenganipun Bapa..... (hamengku gati) kepingin hangaturaken cihnaning raos bingah-ing
manah dateng jengandika sami, kanthi ngaturaken pasegahan ingkang awujud
pasugatan unjukan sarta daharan ingkang sarwi perasaja. lumados ing ngarsa jengandika
sami, hananging panjenenganipun Bapa.....
(hamengku gati) kanthi andhap asorning manah nyuwun pangapunten dene
samangke pasegahan kula datan miraos, injukan kang kirang manis jalaran kirang
juruh, sarta daharan kang kirang miraos jalaran kirang lawuh. Sarta lumadosing
kirang iguh, namung gungan kula kepareng icalno raos jiguh lan pekewuh.
Lan samangke mbok bilih wiwahan panggih ing titi kalodangan puniki wus pari
purna, tumuli handika arsa jengkar saking papan palenggahan tumuli kundur, mugi
– mugi tindak jengandika tansah pinayungan rahayu, tebih saking sambikala, satemah manggih rahayu salami-laminya.
Pinangka pungkasaning atur, kasuwun jengandika sami tetepa lelenggahan
kanthi sekeca, ngantos dumugi purnaning pawiwahan panggih samangke.
Kula ingkang sampun kepareng matur, pinongka gantosing raga sinambeting
atur panjenengan-ipun ingkang hamnengku gati, kepanggih kirang wijang anggen kula
matur, nun-injih jalaran kiranging seserepan kula babagan reh-ing basa, sastra,
ukara, malah kepara nalisir saking angger-angger lan paugeran basa jawi kang
sanyata adiluhung, kanthi andhap asoring manah
nyuwun agunging pangapunten dateng jengandika sami.
Wasana pungkasaning atur Wabilahi Taufiq wal hidayah Wasalamu’alaikum
Wr.Wb.
wekdal kula aturaken dateng kadang pambiwara Nuwun.
sampun dangu kawula angupadi wedaran kados ing blog punika, matur swun lan nyuwun ijin copy paste atur ing nginggil.
BalasHapusbilih handiko kesdu atur kang kaserat ing nginggil kasumanggakaken namung kulo nyuwun pitedah handiko kangge ndadosaken seratan kulo langkung sae maturnuwun
BalasHapus